1Cor 16 | MMX | STEP | Nanga a vara i do ana vaase rinimi mumu levempilas miga malagan axasep min tia xusu ri lok tooro limixin at ne Moroa di nemen to Judaia; mina lox i ngan nia agara vaase vam i ri limixin at laraugu lotu ro at lenep silok Galesia xusu dibak lox i.

1 Corinthians 16

Levenetaba Ri Luvuttadi Nuunu

1 Nanga a vara i do ana vaase rinimi mumu levempilas miga malagan axasep min tia xusu ri lok tooro limixin at ne Moroa di nemen to Judaia; mina lox i ngan nia agara vaase vam i ri limixin at laraugu lotu ro at lenep silok Galesia xusu dibak lox i. 2 Amisik at levenaleng kaala nemi getgesara mina lili levempilas i epovo mina xape i. La mina gagas li i xuren, kusu nenia a noxo sing pilas atnimi mo laaleng nenia ba vot pasa nimi. 3 Melemu do nia ana vot, nenia aba riki tuvuttadi uto Jerusalem, la anaba malagan taba mo luvuttadi migara siam pam midi mi levelinga loklox axasep kusu ridi rip kip laramtaba atnimi. 4 Mo do nenia ana lok mulus tit pas ugo, nedi bok diba emu eburu minia.

Levendoxoma Alii At Ne Pol Kusu Ri Lempatpas Teren

5 Nia aba vot pasa nimi melemu do nenia anat pas keneng at lenep silok Masadonia ketla a noxo nemen abao go. 6 Agut aba nemen eburu minimi go at teventaba teven gaaling, kopla at leven gaaling axap at lamdut kusu nemi miba lok tooro ia at lavatpas tarak dom at levengkot salai nia anat pas teren. 7 Axo vara i do ana vot pasa nimi monga la ana nemen eburu minimi at teventaba tevenaleng mene. A doxoma i do aba nemen eburu minimi at teventaba teven gaaling abao, mo do Leeme Silok na siam.

8 Ketla nia aba nemen nade Epesas se at laaleng at la Pentikos, 9 mila langas ira rem suang pam tia ri lok leven gugu silok ketla buaang bok limixin di ru pe lugugu rak.

10 Mo do ne Timoti na vot pasa nimi, i lox avukat do mina seega rangarang i, mila neni mo ik lok lugugu at Leeme Silok, kerekngan mun ia. 11 Nemen gat tara na lox abulubun kepe i, ketla mina lok tooro i xusu ri lok mo lavatpas teren keneng at lenmila, kusu neni nabamlong bok ude saparav ia; la a doxoma i do neni nabamlong eburu midi luvuttadi nuunu.

12 Ti neton nedik ne Apolos. A sing alolos i xusu naba vot pasa nimi eburu midi leventaba luvuttadi nuunu; ketla neni i xopara rinotno xusu ni mo nat pas ta. Do tevenaleng na sepmus tin, neni nabat pas.

Levelinga Loklox Alolos

13 Mina lok tatao avukat amisik lorooro atnimi. Mina tu tuxuruxun at lunuunu atnimi la nemen mita marat. 14 At lorooro axap atnimi mina lox asuusu labalamu.

15 Miklen ne Stiven midi loxoetemen, nedi avot diga lok ka lorooro maxat to Grik, la nedi xa diga raba axap pam di ri lugugu at ne Moroa xantubu at limixin teren. La a sing nimi, luvutnetak mi luvurinuk, 16 kusu mina mumu asu levelinga at luvuttadi xerepmo, la atnedi bok di gugu eburu midi.

17 A momo ri lovotpot at ne Stiven la ne Potunatas, la ne Akaikas boro atnimi e, mila dira ru katling pam nimi. 18 La dira lox axis saga labalak kerekngan ta diga lox axis saga lebelen nimi. Luvuttadi xeretna mina lok ngangao aleng atdi.

Levelinga Loklox Axap

19 Limixin nuunu at laraugu lotu xeneng at lenep silok, Asia di lox aonon lomomo atdi saparap nimi. Akuila la ne Pirikila la limixin nuunu dit pot buru amisik to at loogu atdu, di lox aonon bok lomomo atdi. 20 La nedi axap bok luvutnetak nade at laasen at ne Karisito di lox aonon bok lomomo atdi. Mina eseega rangarang mi lenetnes i xaala.

21 Nenia axa ne Pol a malagan i na mi lakngak akmokso. Lavapaase momo rinimi. ^{▼▼Pol ga sok mene na lavapaase momo, la lara vetpes ga malagan levelinga keneng at na lovoang, ne Pol ga vaase i min.}

22 Do nege xopmen na balamu Leeme Silok atdik, lasaxaek naba nemen teren.

Leeme Silok atnema, unamlong.

23 Letaba nabalamu at Leeme Silok atdik ne Iesu na nemen eburu minimi.

24 Labalamu rak nak lox eburu minemi axap keneng at laasen at ne Iesu Karisito. I ruturun.